XornadasArchive for the '' Category

Nov 13 2015

A xeira do Seminario de Estudos Galegos en 1936 á comarca de Fisterra

grial_207

Grial, Revista Galega de Cultura, 207 (xullo, agosto, setembro do 2015), que xa anda desde hai uns días polas librarías e que tamén se pode adquirir en edición dixital desde a propia páxina da Editorial Galaxia, dedica o corpo deste último volume á publicación de varios artigos e documentos baixo o título común «Construír Galicia. No centenario de Xaime Isla Couto».

No último artigo da serie, o profesor de Filosofía e Antropoloxía Social da USC, Xosé Luís Pastoriza Rozas, que coordinou esta sección, exhuma «Dous documentos de Xaime Isla», e nós imos referenciar o primeiro por se centrar nunha visita do Seminario de Estudos Galegos á zona sur da Costa da Morte.

Pastoriza Rozas escribe como preámbulo: «Na primeira quincena de xullo de 1936, Xaime Isla participa como alumno bolseiro do Seminario de Estudos Galegos na xeira de Fisterra, encadrado na sección de Xeografía dirixida por Ramón Otero Pedrayo. Os días 9, 10 e 15 de xullo El Pueblo Gallego de Vigo publica tres das catro crónicas enviadas desde a Costa da Morte por un Xaime Isla que se define como un “pioneer” do xornalismo. O golpe de estado do 18 de xullo sorprende o equipo do Seminario en Fisterra, onde a intervención do crego do grupo, Xesús Carro, evita que un grupo de falanxistas tome medidas de forza contra eles. Por mor do levantamento militar, unha cuarta crónica enviada a Vigo ficaría sen publicar e perdida para sempre. A partir de agosto El Pueblo Gallego converterase no diario da Falanxe de Vigo».

Pastoriza Rozas recupera esa inédita crónica de Xaime Isla Couto co título «O Seminario de Estudos Galegos en Fisterra», que ocupa seis páxinas do Grial, 207. O autor principia por detallar quen fai parte da expedición, entre os que están á fronte Otero Pedrayo, presidente da entidade, coa súa sección de Xeografía; Parga Pondal á fronte da Xeoquímica; Xesús Carro e Filgueira Valverde na de Arte e Arqueoloxía; Vicente Risco na de Etnografía e Folklore ou Luís Iglesias, na de Ciencias, entre outros membros do SEG, que enchen o ómnibus tamén con numeroso material para o estudo e a investigación.

A viaxe atravesa as terras de Negreira, Barcala e A Baña, antes de entar en Terras de Zas e de Soneiras (sic), no que eles denominan terra de Xallas. A primeira estación vai ser a ponte Arantón e a Arca de Ougas (sic, por Arca de Ogas), pois «Eiquí -ergueito castro de forteza racial- está o repouso eterno de Breogán, conductor dos pobos célticos». Fan pausa en Vimianzo para poñer ritmo no apetito e pola noite chegan a Cee, hospedándose no «Nuevo H. París», hoxe desaparecido.

A primeira xornada é unha saída a Fisterra, onde os equipos de cada sección se poñen a traballar en cadansúa investigación, que Xaime Isla Couto describe case ao miúdo. E conta tamén a visita que lle fan ao erudito local, o médico Esmorís Recamán, que os acompaña até o val de Duio («Duyo, a Babilonia galega»), percorrendo os lugares, Denle, Escaselas…, e falando de Duguin (sic, por Duggium), cidade prehistórica asolagada, ao que seguirá un xantar campestre fronte ás batentes do océano. E regresan ao Gran Hotel París, sinala Isla Couto con retranca, de Cee a cearen e a descansaren, alén de transcribiren apuntamentos da xornada de estudo.

Ao día seguinte visitan A Pereiriña, tiran fotos, filman películas documentais e entrevistan a dúas mulleres moi velliñas, antes de viaxaren cara á ría de Lires e o río Castro, tomando o café na casa do señor Vinagre, o cura da parroquia.

Até aquí o documento está en galego e a derradeira páxina está en castelán, principiando por relatar unha «Exploración del monte Pindo»:

«Mientras que los miembros de la sección de Psicotecnia trabajaban en las escuelas de Ameixenda y Brens, los miembros de las demás secciones escalaron el Monte Pindo. Los resultados de esta difícil exploración no fueron tan completos como sería de esperar porque el temporal del miércoles sorprendió a los miembros del Seminario en los picos de Penafiel y les obligó a suspender sus trabajos. Sin embargo, la exploración ha tenido un gran interés y el monte Pindo justificaría hoy por sí solo una campaña de investigaciones».

Novamente regresan a Cee e son agasallados cun concerto da Coral Polifónica no «magnífico colegio de la Fundación Blanco (sic, por Fernando Blanco)».

A mañá do xoves dedicárona integramente á vila de Corcubión e á tarde, pasando por Dumbría visitaron o pazo de Berdeogas e o Castrelo de Villaseco (sic, por Vilaseco), para logo de se deter en San Isidro de Quintán (sic, por Quintáns) antes de seguir cara a Muxía, por Ozón e Moraime, cuxas igrexas tamén son estudadas: «Moraime, tan lleno de problemas, y tan necesitado de que una restauración lo incorpore al número de los monumentos gallegos que han sido devueltos en estos últimos tiempos a todo su esplendor primitivo».

Fan noite en Muxía e ao día seguinte rematan a xeira nos momumentos da vila e no santuario da Barca «la piedra ‘abaló’ aquel día», na igrexa parroquial e, xa de volta, novamente en Moraime.

Até aquí a deliciosa crónica inédita que Xaime Isla Couto realizou da xeira do Seminario de Estudos Galegos en 1936 á comarca de Fisterra.

Comentarios desactivados en A xeira do Seminario de Estudos Galegos en 1936 á comarca de Fisterra

Set 08 2015

Poemas (LXXX): «Art, The Timeless Medium» e «Auto-retrato», de Ana Hatherly

AnaHatherly01

Vai aló máis dun mes que tamén nos deixou unha outra autora que estimo, Ana Hatherly (nada no Porto o 8 de maio de 1929 e finada en Lisboa o 5 de agosto de 2015), da que se pode ler unha biografía nesta anotación na bitácora quadrogiz, foi unha artista plástica, poeta, romancista, tradutora, ensaísta, investigadora, realizadora e profesora da Universidade Nova de Lisboa.

Coñecín a súa obra no lonxíncuo setembro de 1998, aínda que o libro está datado en outubro, cando o poeta e editor portugués Alberto Augusto Miranda, sempre ben relacionado coas e cos poetas galegos (nomeadamente coas autoras e os autores das xeracións dos oitenta e dos noventa), fixo chegarme como agasallo o libro de Ana Hatherly intitulado A Idade da Escrita, publicado no seu propio selo editorial (Lisboa: Edições Tema, 1998), creada no seo do Departamento Literario da Sociedade Guilherme Cossoul, lugar que visitamos algúns poetas galegos no mes de maio dese ano nunha das actividades das I Xornadas das Letras Galegas en Lisboa, que tiveron lugar entre os días 25 e 30 de maio de 1998 na Facultade de Ciencias Sociais da Universidade Nova de Lisboa e que foron organizadas polo Centro Ramón Piñeiro para a Investigación en Humanidades coa colaboración da Sociedade de Instrução Guillerme Cossoul, das que se publicaron Actas.

Até daquela non coñecía eu a obra desta autora malia que xa levaba máis dunha ducia de libros publicados de poesía e tamén de poesía visual, de feito a capa e a contracapa deste poemario está conformada por caligramas da autoría da propia Ana Hatherly.

Ao recuperar a súa lectura nos días deste último agosto inusualmente sombrizo, nun volume que se abre coa dedicatoria do Alberto Augusto Miranda «Com o forte abraço do Alberto», revisito unha serie de poemas que moito me interesou, os máis deles de recendos metaliterarios ou metapoéticos, e dos que hoxe recupero a penas dous textos do seu A Idade da Escrita: «Art, The Timeless Medium» e «Auto-retrato», que me serven para lembrar unha enorme poeta á que non coñecín persoalmente, mais da que me sentín próximo literariamente.

«Art, The Timeless Medium»

O poeta não quer duplicar o mundo
não quer fazer dele uma cópia:

Luta com a palavra
como Jacob lutou com o anjo
mas a escada que ele sobe
conduz a outras alturas
a outras planuras

É assim que o poeta
palavra por palavra
como pedra sobre pedra
constrói o edifício do poema

E a sua mão
robótico instrumento comandado
pela algébrica lógica do sentido oculto
produz
deve produzir
o que o mundo não tem
o que o mundo não diz
o que o mundo não é.

«Auto-retrato»

Este que vês, de cores desprovido,
o meu retrato sem primores é
e dos falsos temores já despido
em sua luz oculta põe a fé.
Do oculto sentido dolorido,
este que vês, lúcido espelho é
e do passado o grito reduzido,
o estrago oculto pela mão da fé.
Oculto nele e nele convertido
do tempo ido excusa o cruel trato,
que o tempo em tudo apaga o sentido;
E do meu sonho transformado em acto,
do engano do mundo já despido,
este que vês, é o meu retrato.

A obra artística de Ana Hatherly tamén se relacionou co cinema como amosa esta excelente curta inspirada na Revolução dos Cravos:

Revolução, by Ana Hatherly, 1975 – full version 5 minutes (16mm, color and sound).

Comentarios desactivados en Poemas (LXXX): «Art, The Timeless Medium» e «Auto-retrato», de Ana Hatherly

Set 07 2015

Unha obrigada lembranza do amigo grovense Luís Rei Ñúñez

LuísRei01
LuísRei02
(Fotografías da autoría de Xosé Carlos Rodríguez, 6 de xuño de 2015 en Cambados. Premer nas imaxes para agrandar o tamaño)

Esta bitácora coñeceu un prolongado silencio en agosto por motivos persoais e neses días, en concreto o 10 de agosto, sucedeu o pasamento do meu caro amigo grovense Luís Rei Ñúñez, bibliotecario e Técnico de Cultura do Concello de Cambados, ao quen non puiden acompañar o día do seu soterramento, razón que xustifica esta pequena e emocionada lembranza.

Nesta ligazón da canle youtube pódese ollar un video sobre o acto de despedida organizado pola veciñanza de Ogrobe e da contorna, que foi presentado pola profesora Carme Hermida e no que se leron poemas de Ramón Cabanillas (autor do que Luís Rei Núñez escribiu unha monumental e erudita biografía Ramón Cabanillas. Crónica de desterros e saudades, de obrigada lectura), versos aos que puxeron voz cidadáns que non coñezo, mais tamén o académico Francisco Fernández Rei ou o poeta Anxo Angueira, presidente da Fundación Rosalía de Castro. Canda eles tamén o poeta Emilio Xosé Ínsua, un dos mellores amigos e camarada de Luís Rei Núñez en Anova – Irmandade Nacionalista quen le un texto da súa propia autoría. De Emilio Xosé Ínsua son tamén esta necrolóxica publicada na súa bitácora A ínsua do Ínsua, na que tamén podemos atopar unha longa e documentada anotación intitulada «Na entrega a Luís Rei da entrega do XII Premio Ramón Cabanillas en Cambados 16.5.2015». E nesta outra ligazón pódese ler a derradeira entrevista que lle fixeron, unha conaversa coa xornalista Rosa Estévez ao fío do devandito recoñecemento público.

Non hai moito puiden conversar persoalmente con Luís, máis alá dos correos electrónicos, primeiro aló por maio na actividade de formación permanente do profesorado Roteiro literario a Ría de Arousa na literatura. Viaxe ao Salnés de Valle-inclán e Cabanillas, no que era un dos relatores. Precisamente a moita información que nos deu aconsellou aos organizadores, nomeadamente ao amigo Xosé Carlos Rodríguez, a artellar outra nova xornada de formación permanente do profesorado En Cambados con Cabanillas, que se celebrou o día 6 de xuño de 2015 e con só dous relatores, o académico Francisco Fernández Rei e o propio Luís. Moito aprendemos e gozamos coas súas palabras e aínda houbo tempo para falarmos de intereses propios na literatura.

Ata daquela as nosas anteriores comunicacións epistolares viñeran a conto do seu apoio económico á iniciativa do volume colectivo Versos no Olimpo. O monte Pindo na poesía galega, que coordinei xunto a Francisco «Chisco» Fernández Naval, editado por Toxosoutos, en coedición coa Asociación Monte Pindo Parque Natural, e publicada grazas ao crowdfunding ou microfinanciamento colaborativo de moitas persoas, como xa se contou aquí.

E antes diso intercambiaramos varios correos electrónicos ao fío dunha das investigacións que lle ocupaban nos últimos tempos, unha biografía do líder agrarista Basilio Álvarez, que se cadra non puido rematar.

Sempre lembrarei con afecto ao amigo grovense Luís Rei Ñúñez pola súa enorme erudición e pola súa amenidade á hora de contar o moito que sabía e tampouco nunca hei esquecer a súa xenerosidade á hora de partillar datos biobliográficos ou historiográficos. Aínda lembro cando andaba eu a investigar sobre o poeta muxián Gonzalo López Abente como me agasallou coa edición facsimilar dos xornais cambadeses El Umia (1907) e El Cometa (1910), que me foron de utilidade. Todo iso e moito máis fará que teña sempre na memoria a súa amizade.

Que a terra che sexa leve, caro Luís!

(Fotografías da autoría de Xosé Carlos Rodríguez, 6 de xuño de 2015 en Cambados. Premer nas imaxes para agrandar o tamaño)
LuísRei03
LuísRei04

Comentarios desactivados en Unha obrigada lembranza do amigo grovense Luís Rei Ñúñez

Xul 16 2015

Presentación mañá venres na Casa dos Alonso (A Guarda) da «V Mostra das Tradicións Mariñeiras» adicada aos gameleiros

MostraTradiciónsMariñeiras2015
(Premer na imaxe para agrandar o tamaño)

Mañá, venres, 17 de xullo de 2015, á tardiña (pois pola mañá andaremos na manifestación en defensa do sector leiteiro en Compostela) estaremos na convocatoria do Concello da Guarda e da Asociación de Redeiras do Baixo Miño-Atalaia na denominada Casa dos Alonso para asistirmos á presentación da «V Mostra das Tradicións Mariñeiras» que este ano vai estar adicada aos gameleiros, unhas xornadas que terán lugar os días 24, 25, 26 de xullo no Porto da Guarda, para divulgar e promocionar con diferentes actividades a vida mariñeira da Guarda.

Como adianto, alén da presentación das xornadas, inaugúrase unha exposición baseada no libro Gameleiros (Xerais, 2002), con fotografías do guardés Manuel Álvarez e poemas da miña autoría. Por esa razón Manuel e mais eu recibimos o convite de Javier Crespo González, concelleiro de Patrimonio, para estar no acto, cabo do alcalde Antonio Lomba e de membros de todas as asociacións colaboradoras nesta edición e unha representación das redeiras da Guarda.

Gameleiros, hoxe descatalogado por Xerais, fora presentado o 19 de setembro de 2003 na Lonxa do Porto da Guarda, nun acto aquí reseñado que contou coa actuación do cantautor e músico guardés Tino Baz e as palabras do director de Edicións XeraisManuel Bragado, así como coa presenza dos gameleiros fotografados por Manuel Álvarez neste volume.

Gameleiros

Comentarios desactivados en Presentación mañá venres na Casa dos Alonso (A Guarda) da «V Mostra das Tradicións Mariñeiras» adicada aos gameleiros

Out 24 2013

Hugo Mujica gañador do XIII Premio Casa de América de Poesía Americana pola súa obra Cuando todo calla


Alégrame moitísimo a nova de que o escritor arxentino Hugo Mujica sexa o recente gañador do XIII Premio Casa de América de Poesía Americana pola súa obra intitulada Cuando todo calla.

Tiven o inmeso pracer de gozar da lectura comentada da súa magnífica poesía e tamén de o tratar un bocadiño durante a homenaxe que se lle fixo, e da que participei, no desenvolvemento do XIV Encuentro de Poetas Iberoamericanos en Salamanca que ocupou xa estas catro notas nesta bitácora:

Fotografías do XIV Encuentro de Poetas Iberoamericanos

Poemas (XV): Como el mar, de Hugo Mujica

Na homenaxe ao poeta Hugo Mujica en Salamanca

Programa do XIV Encuentro de Poetas Iberoamericanos en Salamanca

Na miña opinión, Hugo Mujica é unha persoa humilde e un poeta enorme. Velaquí o texto da nova na páxina de casamerica:

24/10/2013. El escritor argentino Hugo Mujica es el ganador del XIII Premio Casa de América de Poesía Americana por su obra ‘Cuando todo calla’. En la tarde de ayer, el jurado compuesto por José Mármol, Julia Escobar Moreno, Luis García Montero, Jesús García Sánchez, Juan Malpartida y Anna María Rodríguez Arias como secretaria, se reunió en Casa de América y decidió por mayoría otorgar el galardón al poeta argentino. De la obra presentada, el jurado destaca que se trata de una poesía “de muy hondo pensamiento y de una gran exquisitez estética, basada en una escritura de expresión madura, sopesada, pero, sin matar la espontaneidad luminosa del arte poético”. También ha celebrado su “lenguaje minimalista, preciso, de profundo calado conceptual y humano”, así como su “poesía de impecable factura expresiva”, una poesía que, asegura, “redescubre la vitalidad de lo natural y el silencio frente a un mundo y una sociedad atosigados, intoxicados por el ruido, lo superfluo, la irracionalidad tecnológica y el consumismo líquido y banal”.

Este premio, convocado por Casa de América con la aspiración de estimular la escritura poética en el ámbito de las Américas, está dotado con tres mil euros como anticipo de derechos de autor, e incluye la publicación de la obra por la Editorial Visor Libros.

A la convocatoria de este año se han presentado más de 216 obras de 27 países diferentes, en las que conviven modos muy diferentes de entender la poesía, con una amplia gama de formas, tonos y registros.


(Fotografía de grupo dalgúns dos poetas participantes no XIV Encuentro de Poetas Iberoamericanos o 6 de outubro do 2011, cando visitamos o Ayuntamiento de Salamanca onde Hugo Mujica foi nomeado «Huésped Distinguido de la Ciudad de Salamanca», de esquerda a dereita figuran Alfredo Pérez Alencart; Pedro Tarquis; Pilar; a cubana Milena Rodríguez; José Antonio Valle Alonso; eu propio detrás; Hugo Mujica; a venezolana Cristina Falcón Maldonado e o compañeiro da escritora cubana, do que non consigo lembrar o nome. Premer na imaxe para agrandar o tamaño)

Comentarios desactivados en Hugo Mujica gañador do XIII Premio Casa de América de Poesía Americana pola súa obra Cuando todo calla

Out 21 2013

Breizh na «Xornada de Bretaña en Galicia»

A «Xornada de Bretaña en Galicia» («DevezhBreizh e Bro-Galissia», «Journée de la Bretagne en Galice») celebrada o pasado venres 18 de outubro no Conservatorio Profesional de Música de Compostela acolleu entre as súas numerosas e variadas actividades unha presentación do meu libro de poemas Breizh (Toxosoutos).

A xornada está inserida no marco dun proxecto educativo europeo, denominado Comenius Regio, que ten por título “Échangeons notre échange scolaire” e que ten por obxectivo fomentar os intercambios escolares entre Galiza e Breizh.

Os socios do proxecto educativo son na parte galega: a Unidade de Programas Europeos da Consellería de Cultura e Educación da Xunta de Galicia, a Asociación de Profesores de Francés de Galicia e dous centros educativos: o IES Plurilingüe Xosé Neira Vilas de Oleiros e o IES Monte Neme de Carballo, e na contraparte bretoa: a Concello de Vannes, o Comité Bretagne-Galice e Collège Notre-Dame Le Ménimur de Vannes.

O programa (que se pode ollar completo neste pdf: Pre-programme Affiche journee bretagne 4-10-13

ou tamén neste blogue) desenvolveuse deste xeito:

– Powerpoint d’images d’élèves

– Présentation de la ville de Vannes / Vidéo

– Madame Annie Avril – Service Patrimoine – Ville de Vannes

– Table ronde : expériences d’échanges (Monsieur Vidal, Madame Leblay, Pablo Carpintero, Aymerick-Louis Bevan e 2 alumnosIESP Xosé Neira Vilas, de Oleiros / IES Monte Neme, de Carballo)

– La langue bretonne: Léna Marie Kerhoas, professeur de breton

– Conteur Breton: M. Antoine Peralta

– Presentación Breizh: Miro Villar

– Musique: Pablo Carpintero, música galega, e Bagdad, agrupación musical bretoa.

Malia a insistente e forte chuvia, acompañada de vento, o salón de actos do Conservatorio Profesional de Música de Compostela encheuse de público, a maioría profesorado de lingua francesa, mais non só.

Pola miña banda, dispuxen de vinte minutos para facer unha breve presentación de Breizh, que acompañei da lectura dunha ducia de haikus do libro, acompañados de fotografías fornecidas polo profesor e escritor Xosé María Lema Suarez, autor do limiar do libro, que tamén é presidente do Seminario de Estudos Comarcais da Costa da Morte (Semescom), entidade que organizou a nosa viaxe a Breizh no verán do 2007.

Desde o público gocei tamén de todas as intervencións, de maneira especial das imaxes e das explicacións sobre a fermosa cidade medieval de Gwenwed / Vannes; da ilustrativa información sobre a situación actual da lingua bretoa e das músicas galega e bretoa.

Velaquí dous dos haikus que lin e as súas correspondentes imaxes de Lema Suárez (premer para agrandar o tamaño):

GAVRINIZ

Cruces, machados,
gravuras a saudaren
o adeus da morte.

PLEIBEN, GWIMILIO OU PLOUGASTELL-DAOULAZ

Libros de pedra
iluminan as sombras,
paixón de Cristo.

Comentarios desactivados en Breizh na «Xornada de Bretaña en Galicia»

Ago 08 2013

Presentación na Feira do Libro de Cee do volume colectivo Versos no Olimpo. O monte Pindo na poesía galega (martes, 13, ás 22,30 h.)

A organización da Feira do Libro de Cee 2013 convidoume a participar nesta nova edición que se vai desenvolver do 11 ao 18 de agosto. Puiden escoller facer a presentación dun dos tres volumes que publiquei desde a anterior: o conto infantil rimado Rebelión na charca (Sotelo Blanco), o poemario Breizh (Toxosoutos) ou a edición Poesía Completa de Gonzalo López Abente (Espiral Maior), porén escollín presentar o volume colectivo Versos no Olimpo. O monte Pindo na poesía galega, que coordinei xunto a Francisco “Chisco” Fernández Naval, editado por Toxosoutos, en coedición coa Asociación Monte Pindo Parque Natural, e grazas ao crowfunding ou microfinanciamento colaborativo de moitas persoas, como xa se contou aquí. Estarei cabo de Xilberto Caamaño Beiro, presidente de Monte Pindo Parque Natural, e dos poetas da Costa da Morte que se acheguen, xa que Chisco non pode estar na noite do martes 13, aínda que estará o sábado 17 para presentar a novela que máis me gustou das publicadas o ano pasado na nosa literatura, a fascinante A noite branca (Xerais).

Ese martes 13 tamén estarei na caseta da libraría Á lus do candil, do poeta Modesto Fraga e a súa compañeira Alba, para asinar exemplares das miñas obras. Será un pracer estar canda eles.

A Feira do Libro de Cee vai estar na Alameda (que se denomina oficialmente Praza da Constitución, nome que me horroriza) e as casetas estarán abertas ao público polas mañás: de 11.00 a 14.00 horas (agás os días grandes 15, A Xunqueira, e 16, o San Roque, que abrirán ás 12.00 horas) e polas tardes de 18.00 a 22.00 horas.

Velaquí o programa ao completo:

Domingo, 11

Apertura da Feira ás 11.00.

A partir das 20.00 h. diante do Museo Fernando Blanco, presentación das obras Cancela aberta (Xerais) e Aquel neno (Embora) de Xosé Neira Vilas, acompañado por Francisco Rodríguez López de Edicións Embora.

21.00 h. na Praza da Constitución, pregón da Feira do Libro, a cargo de Xosé Neira Vilas, acompañado por Valentín García, secretario xeral de Política Lingüística da Xunta de Galicia.

Ás 22.30 h. Noite de terraza literaria con Xosé Iglesias, o mariñeiro-poeta: “Transfusión oceánica” na rúa Domingo Antonio de Andrade (Bar A Parada).

Luns, 12

Ás 11.30 h. na Praza da Constitución, Un anaquiño de contos con DuenSico: ”Contos para a igualdade”.

A partir das 20.15 h. diante do Museo Fernando Blanco, presentación da obra Costa do Solpor de Xosé María Lema Suárez, finalista do Premio Xerais 2012, acompañado por Víctor Manuel Castiñeira Castro e o poeta Alexandre Nerium.

Deseguida, Serán de Música e Poesía, Versus Cianuro, recital coa presenza, entre outros, de Paco Souto.

Ás 22.30 h. Noite de terraza literaria con Xaime Trillo: “Anatomía da ira” na Praza da Constitución (Bar Expréss).

Martes, 13

Ás 11.30 h. na Praza da Constitución, Un anaquiño de contos con Ana Mª Martínez, Jesús Toba e María José Rey: “O corvo Roque”.

A partir das 19.30 h. diante do Museo Fernando Blanco, presentación da obra Viaxe ao interior da fenda (Sotelo Blanco), de Serxio Iglesias, que estará acompañado por Marcos Giralt Torrente, Premio Nacional de Narrativa.

A partir das 20.15 h., no mesmo lugar, presentación da obra Fadita fosca! (Baía Edicións), de Miguel Vázquez Freire, coa presenza do ilustrador Xosé Tomás e de Belén López Vázquez.

Ás 22.30 h. Noite de terraza literaria na rúa da Pena (zona bares Marigel e Recunquiño): recital a cargo de varios poetas e presentación da obra Versos no Olimpo. O monte Pindo na poesía galega (Toxosoutos), coa presenza de Xilberto Caamaño, presidente de Monte Pindo Parque Natural, e Miro Villar, coordinador da obra.

Mércores, 14

Ás 11.30 h. na Praza da Constitución, Un anaquiño de contos con Rocío Leira,  autora da obra Universo Pitágoras  Biblos), cun obradoiro matemático para nenos.

A partir das 12.30 h. diante do Museo Fernando Blanco, presentación da obra Contos de soños e sombras de César Ariza Piñeiro, editada por Urco Editora, acompañado por David Cortizo de Urco Editora.

Sábado, 17

A partir das 12.30 h. diante do Museo Fernando Blanco, presentación da obra A noite branca (Xerais), de Francisco X. Fernández Naval, que estará acompañado por Víctor Manuel Castiñeira Castro.

Domingo, 18

Ás 12.30 h. na Praza da Constitución, Un anaquiño de contos con Beatriz Maceda: Man. O alemán de Camelle, e obradoiro de materiais creativos.

Desde as 16.30 h. na Praza da Constitución, gran festa infantil co “Garabato de xogos”, inchables e desde as 20.30 h. concerto a cargo de Mamá Cabra.

Peche da feira, ás 22.00 h.

Comentarios desactivados en Presentación na Feira do Libro de Cee do volume colectivo Versos no Olimpo. O monte Pindo na poesía galega (martes, 13, ás 22,30 h.)

Xul 15 2013

Obrigado, moitas grazas, Miguel Brotóns



(Primeira páxina da partitura do compositor Miguel Brotóns sobre o poema de Gonzalo López Abente «O meu mar», e fotografía ao seu carón no Consello da Cultura Galega o 10 de maio do 2012. Premer nas imaxes para agrandar o tamaño)

As actividades da primeira xornada do cincuentenario do pasamento de Gonzalo López Abente celebradas na tardiña e noitiña do pasado sábado, 13 de xullo, tiveron o seu cumio coa estrea mundial da partitura musical que o compositor Miguel Brotóns realizou do poema de Gonzalo López Abente «O meu mar», na voz da soprano Teresa Novoa e o pianista Alejo Moledo. A partitura completa está ao voso dispór nesta ligazón páxina da Fundación Gonzalo López Abente, organizadora dos actos.

Non puidemos transmitirlle ao compositor os nosos parabéns, porque motivos persoais impediron a súa presenza no concerto, mais esta anotación quere renderlle público agradecemento e tributo polo seu magnífico e desinteresado labor de introducir os versos de Gonzalo López Abente no mundo da música culta, a carón doutros poetas. De feito o concerto incluíu moitas composicións de autores galegos, entre as que sobrancearon, por seren as máis coñecidas para a maioría dos asistentes, «Negra sombra», con letra de Rosalía de Castro e música de Juan Montes, e «Lela», con letra de Castelao e música de Rosendo Mato Hermida.

A miña feble formación musical, algo que sempre botei de menos, non me permite emitir xuízos de especialista sobre a proposta de Miguel Brotóns, mais a xulgar pola interpretación da soprano Teresa Novoa e o pianista Alejo Moledo, faime acreditar que a composición é sublime e mestura momentos de calma e de forza interpretativa na estrofa na que se invoca o mar, seguida novamente da calma en recitado. Dáme a impresión persoal que Miguel Brotóns, de orixe mediterránea pois é alacantino, soubo recoller moi ben o espírito deste atlántico «gran creadore dunha eterna traxedia», como remata o marabilloso poema de Gonzalo López Abente. E así o soubo entender o público que asistiu á estrea co seu prolongado aplauso.

Alén diso, a miña gratitude é dobre porque previamente a esta estrea puiden escoitar por vez primeira a partitura musical creada polo compositor Miguel Brotóns sobre o meu soneto «Negación de Ulises e Teseo», do libro Equinoccio de primavera (Esquío, 1998), que xa reproducimos nesta bitácora e que fan parte do libro Dezaseis cancións para voz e piano editado polo propio Consello da Cultura Galega en colaboración coa Asociación Galega de Compositores, dentro dos actos que conmemoraban o XXV aniversario desta agrupación. Esta peza sobre o soneto da miña autoría tivo a súa estrea o sábado 15 de decembro do 2012 en Ourense, mais outras obrigas non me permitiron a presenza nese concerto, onde tamén foi interpretada na voz da soprano Teresa Novoa, acompañada ao piano por Alejo Amoedo.

E eu, coñecedor das moitas horas de labor compositivo que hai detrás destas partituras de Miguel Brotóns síntome na obriga de testemuñar desde esta bitácora o meu agradecemento persoal e o meu afecto por lle poñer música ao poema de Gonzalo López Abente que máis estimanza me produce.

Obrigado, moitas grazas, Miguel Brotóns.

Comentarios desactivados en Obrigado, moitas grazas, Miguel Brotóns

Xul 12 2013

A mostra escultórica e pictórica de Viki Rivadulla «O meu mar» abre os actos do L aniversario do pasamento de Gonzalo López Abente, mañá en Muxía

Published by under Arte,Música,Poesía,Xornadas


(Peza «O meu mar» de Viki Rivadulla. Foto de Ubaldo Cerqueiro, quepasanacosta)

A mostra escultórica e pictórica de Viki Rivadulla intitulada «O meu mar», como o mellor poema de Gonzalo López Abente, continúa o seu percorrido.

Xa se contou aquí como foi a nosa participación cando se presentou en Carballo o pasado 1 de marzo e mañá sábado, 13 de xullo ás 20.30 horas, Viki Rivadulla xoga na casa, co que iso ten sempre de fermoso e perigoso a un tempo (por aquilo que se adoita dicir de non sermos profetas na propia terra). Será no Centro Social de Muxía -baixo do edificio de servizos múltiples da Camposa- e a inauguración fai parte dos actos que a Fundación López Abente celebra para conmemorar o 50 aniversario do pasamento do poeta muxián.

Desta volta, cabo da artista estaremos nesta inauguración o crítico de Arte Antón Castro e os poetas Rosalía Fernández Rial, Serxio Iglesias, Miguel Mato Fondo, X. H. Rivadulla Corcón e eu propio.

As actividades desta primeira xornada do cincuentenario do pasamento de Gonzalo López Abente continúan esa mesma noite coa estrea da partitura musical que o compositor Miguel Brotóns realizou do poema de Gonzalo López Abente «O meu mar», na voz da soprano Teresa Novoa e o pianista Alejo Moledo.

One response so far

Mar 13 2013

Programa da V Bienal «De pedra e de palabra», organizada polo Centro PEN Galicia

Na década dos noventa houbo quen quixo alimentar, desde dentro e desde fóra, unha suposta liorta ou enfrontamento entre poetas da denominada «promoción ou xeración dos oitenta» e poetas que viñamos detrás, a raíz da publicación deste manifesto que asinaba meu irmán Rafa Vilar, no que se facía referencia á necesidade de «matar o pai». A referencia está dispoñible nese magnífico proxecto dirixido polo poeta e profesor Arturo Casas, poesiagalega.org, onde realizan esta entrada:

«Este texto en prosa foi lido no Encontro de Escrtitores/as Novos/as celebrado o 7 de decembro de 1996. Interpretado como unha sorte de manifesto da chamada “xeración poética dos 90”, levantou unha sonada polémica pois o epígrafe 24 foi visto como un ataque directo contra os antecesores dos 80, e contra as figuras que naquel intre ocupaban posicións canónicas na poesía galega».

Na miña opinión houbo voces interesadas en non saber ler este texto, que varios poetas dos noventa subscribimos como propio. En resumo, o que alí se reivindicaba era o feito de termos voz propia, de deixar de sermos subalternos, ao tempo que se recoñecía o fundamental maxisterio dos poetas que nos antecedían, como demostraban as nosas lecturas e algo tan importante como os paratextos dos nosos poemas, nos que a citación de versos dos poetas dos oitenta era moi recorrente.

Non vou recordar aquí e agora a tinta desgastada de maneira inútil neste confronto. A realidade, teimuda coma sempre, encargouse de demostrar andando o tempo a comuñón que se deu entre todos nós (malia algún incial e forte desencontro persoal).

Vén este preámbulo a conto de que o vindeiro sábado 16 de marzo vou facer a presentación de sete poetas desa promoción dos que me enorgullo de ser lector desde os seus primeiros versos.

Será na segunda xornada da V Bienal «De pedra e de palabra», organizada polo Centro PEN Galicia e cuxo programa completo vai desguida.

V BIENAL LITERARIA INTERNACIONAL

“DE PEDRA E DE PALABRA”

15 e 16 de marzo 2013

Aula Seminario do Museo Centro Gaiás – Cidade da Cultura – Santiago de Compostela

PROGRAMA

Venres, 15 de marzo

11:30 hs.- Palabras de benvida

Xabier Castro Martínez (Director Centro PEN Galicia)

11:45 hs.- De pedras e poetas na literatura galega

Ramón Nicolás e Román Raña

12:30 hs.- Pausa-café

12:45 hs.- In cammino fra le pietre della letteratura italiana

Massimo Saltafuso

Presenta: Manuel Outeiriño

13:30 hs.- Percorrido pola exposición Gallaecia Petrea

17:00 hs.- Cando falan as pedras. Lecturas comentadas

Clara Usón

Bieito Iglesias

Diego Ameixeiras

Modera: Inma López Silva

18:15 hs.- Pausa-café

18:30 hs.- Acto inaugural

Luís González Tosar (Presidente Centro PEN)

Jesús Vázquez Abad (Conselleiro de Cultura, Educación e Ord. Univ.)

19:00 hs.- Contar la vida

Luis Mateo Díez

Presenta: Alfredo Conde

Sábado, 16 de marzo

12:30 hs.- Versos con melodías

Presentación de Sinfonía Atlántica. Antología general de la poesía gallega

Ed. Bilingüe (Eneida, 2012)

Carlos Clementson

Miro Villar

Xosé Mª Álvarez Cáccamo

Marica Campo

Manuel Forcadela

Luís González Tosar

Xulio L. Valcárcel

Cesáreo Sánchez Iglesias

Xavier Seoane

(Grupo Tradicional da AGADIC)

Todas as actividades están abertas ao público

Comentarios desactivados en Programa da V Bienal «De pedra e de palabra», organizada polo Centro PEN Galicia

« Prev - Next »