Abr 02 2012

No Día Internacional do Libro Infantil e Xuvenil

Published by at 23:20 under Contos,Infantil,Poesía

O día 2 de abril conmemórase o Día Internacional do Libro Infantil e Xuvenil co fin de lembrar o nacemento do escritor danés Hans Christian Andersen, autor prolífico de contos infantís (e non só).

Pola miña banda, levo até hoxe publicados seis títulos de literatura infanto-xuvenil:

Carlota, a marmota que non podía durmir (Xerais, 2000); Carlota e a bota perdida (Xerais, 2002) e Carlota e a gaivota patiamarela (Xerais, 2006), todos tres ilustrados por Luís Castro Enjamio.

O nariz de Fiz (Deputación de Ourense, 2008), que ilustrou Lola Lorente.

A cobiza do verme Noel (Galaxia, 2011), que ilustrou Marta Álvarez Miguéns.

E Rebelión na charca (Sotelo Blanco, 2012), que ilustrou Ana Santiso.

Así a todo, o meu achegamento á literatura infanto-xuvenil foi serodio e produciuse cando presentei o conto Carlota, a marmota que non podía durmir a un certame literario, sendo merecedor do XXIX Concurso Nacional de Contos Infantís convocado pola coruñesa A. C. O Facho en 1998, que tardaría aínda uns anos en ser ilustrado e publicado no catálogo de Xerais, no que na actualidade non aparece por se tratar dun libro esgotado hai anos. E aquí un bate coa incomprensión de ollar coma outros títulos da mesma colección foron reeditados e este aínda non, malia o interese de dous colexios públicos da Costa da Morte por traballar este texto nas aulas.

Aproveito para recuperar aquí unha breve recensión deste libro que escribiu o mestre (en todos os sentidos) Agustín Fernández Paz.

Revista Galega do Ensino-ISSN: 1133-911X- Núm. 30 – Febreiro 2001
O PRACER DE LER
Literatura infantil e xuvenil
Agustín Fernández Paz
Instituto Os Rosais II
Vigo

Título: Carlota, a marmota que non podía durmir
Texto: Miro Villar
Ilustracións: Enjamio
Colección: Merliño
Editorial: Edicións Xerais de Galicia. Primeiros lectores

Chega o inverno, o tempo de durmir ata que chegue a primavera. Pero a marmota Carlota ten un grave problema: a ela non lle vén o sono. Desesperada, vai pedir consello á Osa Rosa, ó Leirón Ramón, ó Castor Pastor… Pero as solucións que lle ofrecen non dan resultado, e Carlota está cada vez máis preocupada. Finalmente, será o Esquío Uxío quen lle dea o consello que a fará durmir.

Velaquí un álbum que merece tódalas loanzas. Tanto o texto de Miro Villar como as ilustracións de Enjamio teñen unha alta calidade. O texto é un conto rimado, rebordante de enxeño e humor, que se vai abrindo como unha inesgotable caixa de sorpresas. En canto ás ilustracións, resulta difícil expresar con palabras a imaxinación, brillantez e perfección técnica (mediante collages e ceras, principalmente) que Enjamio consegue neste álbum. Unha delicia de libro, e non só para os lectores máis novos.

One response so far

One ResponseNo Día Internacional do Libro Infantil e Xuvenil to “”

  1. […] cultural ten moito a ver coa miña entrada serodia no mundo da literatura infantil (como se contou nesta bitácora) xa que os comezos da miña produción neste eido foron ao concorrer ao XXIX Concurso Nacional de […]